Haberler

Mıstetskiy Arsenalda berim ayınıñ 19-da insan aqları saasındaki bozuluvlardan zarar körgen insanlarğa qol tutuv olaraq ”Mektüpler marafonı 2021” halqara aq-uquq qorçalavı tedbiri başlandı. Tedbirniñ teşebbüsçisi Amnesty International Ukraine.halqara aq qorçalayıcı teşkilâttır. Marafonnı Amnesty International teşkilâtınıñ müdiri Oksana Pokalçuk açtı.

Tedbir iştirakçileri Genç teatr vastasınen Marafonnıñ qaramanları aqqında temaşanı seyir etti, muracaatlar imzaladı ve aqları ve serbestlikleri bozulğan insanlarğa mektüpler yazıp oldı. Olarnıñ arasında Qırım Aqiqat, matbuat vastasınıñ frilanseri, jurnalist Vladıslav Yesıpenko da bar edi.

Tedbirde bulunğan onıñ ömür arqadaşı Katerına Vladıslavnıñ ağır ruhiy vaziyette bulunğanını, amma insanlarnıñ qol tutuvı oña pek yardım etkenini bildirdi.

Hatırlatamız ki, 2015 senesi jurnalist Vladıslav Yesıpenko qorantası ile işğal etilgen Qırımdan Ukrainanıñ nezareti altında bulunğan topraqlarğa köçmege mecbur edi.

Amma bundan soñ Vladıslav jurnalist-frilanser olaraq çalışmaq ve işğalni teñqit etken matbuat vastaları içün içtimaiy ve ekologik meselelerni aydınlatmaq maqsadınen tez vaqıtta yarımadağa qayttı. Onıñ faaliyeti pek müim edi, çünki Qırım ilhaq etilgen soñ, yarımadada mustaqil matbuat vastaları qalmadı.

2021 senesi saban ayınıñ 10-da Vladıslav ile bağ üzüldi, o, mesajlarğa cevap bermey edi. Keççe, Rusiye Federal havfsızlıq hızmetiniñ hadimleri onı Anğara köyüniñ civarlarında yaqalap, sözde ”Ukraina mahsus hızmetleriniñ menfaatlarına çalışıp, malümat toplağanında” ve sañki arabasında yasama patlayıcı aletni saqlağanında qabaatlağanları aqqında belli oldı.

FSB hadimleri Vladıslavnı elektrik aqımınen qıynadı, kötekledi ve horladı, neticede o, özüni qabaatlı tanıdı. Vladıslav bir ay devamında abulqatlarınen körüşip olamay edi. Onı 18 yılğa qadar apis cezası bekley.

Ukraina Prezidentiniñ Qırım Muhtar Cumhuriyetindeki Temsilciligi Vladıslav Yesıpenkoğa qarşı RF-nıñ areketlerini taqbih ete, onıñ özüne ve qorantasına qol tutuvını bildire.

Muracaatnı imzalap, Rusiyeni deral Vladıslav Yesıpenkonı azat etmege ve oña qarşı bütün qabaatlavlarını lâğu etmege çağırıñız: https://marathon.amnesty.org.ua/heroes/vladislav-esypenko/

Teşebbüs aqqında tafsilâtlı malümat: https://marathon.amnesty.org.ua/

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime 

Yarımadada ”Avromeydan-Qırım” cemaat areketi meydanğa kelgen edi. Memleketimizniñ Avropağa yönelişine qol tutqan birinci tedbir Qırımda 2013 senesi boş aynıñ 24-de teşkil etilgen edi. Tedbirler, Qırım sakinlerini birleştirmek, Kıyivdeki vaqialar aqqında haber etmek ve Ukraina içün Avropağa yöneliş ne sebepten müim olğanını añlatmaq maqsadınen muntazam şekilde keçirile edi. Eñ küçlü ve kütleviy narazlıq tedbirleri Aqmescitte Qırım Yuqarı Şurasınıñ binası yanında keçirilgen edi.

Bugünde-bugün Rusiye propagandası ”Qırım iç bir vaqıt Avromeydanğa qol tutmağan edi” degen yalanlarnı darqatmağa tırışa, Qırım sakinleri ise aksine – RF-nıñ silâlı istilâsına qadar – demokratik Avropa memleketinde yaşamaq aqqı içün küreşken edi. Qırımdan kelme faallerniñ taqdirlerinde ekişer facia yüz berdi. Bir çoq qırımtatarlar balalıqlarında tarihiy vatanlarına sovet birligi tarafından teşkil etilgen sürgünlikten qaytqan soñ, kene de öz mevamını bildirmege, Ukraina halqınıñ saylavına qol tutmağa qorqmağan ediler.

Telükelerge baqmadan, Qırım sakinleri narazlıq tedbirlerine çıqa ediler: Bir çoq insan Kıyiv şeerine barıp, İnqlâpnıñ merkeziy meydanında turğan edi. Avromeydan iştirakçileri qorqutuvlarğa, köteklerge oğray edi, olarnıñ arabaları yaqıldı, amma olar ep bir birleşti, beraberlikte oldı, Qırımdaki Avromeydan öz meydanlarında biñlernen insanlarnı toplay edi.

Bugünde-bugün biz Ukraina milliy meñligi başlanğan yılnı añamız. Bugün biz Meñlik inqlâbı başlanğan künni, Azatlıq ve Meñlik künümizni qayd etemiz.

İnanamız ki, Qırım sakinleri eñ yaqın vaqıtta ceblerinde quru qaysı, termoslarından bir filcan Qırım çayı ile boş aynıñ 21-de öz şeerleriniñ baş meydanlarına çıqıp, keçmişteki tarihiy vaqialarnı hatırlarlar.

Qırımnı işğalden azat etüv oğrunda berabermiz.

Munaqaşa çerçivesinde Temsilcilikniñ faaliyeti, işğalden azat etüvge dair tasdıqlanğan strategiya, Qırım platformasınıñ içki treki çerçivesindeki faaliyet aydınlatıldı. Hususan Tamila Taşeva, Qırım yarımadasını qaytaruv oğrunda müim adımlardan biri olaraq Qırım MC sakinleri içün insaniy siyasetni amelge keçirüv aqqında ikâye etti.

Panel munaqaşada iştirak etken qonuşmacılar Refat Çubarov, Ahtem Seyitablayev, Anife Kurtseyitova, Valentına Potapova, Gayana Yüksel, Mıhaylo Nestâjuk forum iştirakçilerinen beraber qanunsız şekilde apis etilgen abulqat Edem Semedlâyevniñ azat etilmesini talap ettiler.

Boş aynıñ 11-de Temsilcilik vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Fedaratsıyasını temsil etken ve Ukraina vatandaşı, abulqat Edem Semedlâyevniñ azatlıqtan marum etilmesini maqsat etip qoyğan işğalci akimiyetniñ cinaiy areketlerini qattı sürette takbih etti.

https://www.facebook.com/613941962327559/posts/1799174007137676/?d=n

Qırımnı işğalden azat etüv oğrunda berabermiz.

Birleşme çetelde, vaqtınca işğal etilgen topraqlarda ve devletimizniñ içinde siyasiy sebeplerden taqip etüv neticesinde apis etilgen bütün insanlarnıñ aqlarını qorçalamaq ve mabuslarnı azat etmek maqsadınen meydanğa ketirildi.

Körüşüv iştirakçileri Temsilcilik ve Qırım Platforması Ofisiniñ faaliyetini, ukrain siyasiy mabusları meslesini, Temsilcilik ile kelecekteki işbirliklerini ve hususan Kreml mabuslarını azat etüv, siyasiy mabuslarnıñ qorantalarına yardım etüv meselesinde ükümet ile beraberlikte yapılacaq adımlarnı muzakere ettiler.

Bundan ğayrı, Anton Korınevıç Ukraina Prezidenti tarafından acele olaraq taqdim etilip, Ukrainağa qarşı silâlı istilâ neticesinde şahsiy azatlığından marum etilgen şahıslarnı ve olarnıñ qoranta azalarını içtimaiy ceetten qorçalav aqqında 6104 sanlı qanun ve onıñ parlamentteki mevamı aqqında birleşme iştirakçilerini haberdar etti.

Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve onıñ muavinleri Darya Svırıdova ile Tamila Taşeva Ukraina Prezidenti Ofisiniñ müdir muavini Andriy Sıbiga ile körüştiler.

Anton Korınevıç Andriy beyni Qırım platforması Ofisinen, faaliyetiniñ esas yönelişlerinen tanıştırdı.

Şu cümleden, amelge keçirilgen ve yaqın kelecekte amelge keçirilecek leyhalar, eñ yaqın vaqıtta ilk nevbetteki vazifeler arasında olğan ”Qırım platforması” qanun yaratıcılıq teşebbüsleri aqqında ikâye etti.

Bundan ğayrı, aşağıdaki meseleler muzakere etildi:

vaqtınca işğal etilgen topraqlarda yaşağan gençler içün tasil leyhalarnı inkişaf ettirüv

vatandaşlarımıznen bağlarımıznı qorçalav

qırımtatar medeniyetini rağbetleştirüvge qol tutuv.

Boş aynıñ 18-de Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç “COVID-19 pandemic in the context of humanitarian crisis: East Ukrainian situation and international experience” Ekinci halqara onlayn konferentsiyasında iştirak etti.

Tedbirni Ukrainadaki Quddus, Rodos ve Maltadaki Azreti Con Gospitallyerleri Egemen Askeriy Orden Elçihanesi teşkil etti.

Anton Korınevıç vaqtınca işğal etilgen Qırım Muhtar Cumhuriyeti ve Aqyar şeeri topraqlarında COVİD-19 etrafındaki vaziyetni tarif etti.

Al-azırda tacmaraz hastalığı sebebinden hastalanuv, hastahanege yatuv ve ölüm seviyesi bayağı yüksektir.

Bu, Qırım platformasınıñ halqara seviyede faaliyetiniñ daa bir neticesidir.

Rusiye Federatsıyası tarafından vaqtınca işğal etilgen Qırım Muhtar Cumhuriyeti ile Aqyar şeerinde insan aqları saasında vaziyetke dair quvetleştirilgen qararname leyhası Rusiyeni qanunsız şekilde tutulğan Ukraina vatandaşlarını azat etmege, qırımtatarlarnıñ aq-uquqlarına riayet etmege çağıra ve Qırım platformasına qol tutqanını ilk kere bildire.

BM Baş Assambleyasınıñ nevbetteki toplaşuvında quvetleştirilgen qararnameniñ qabul etilüvi Ukrainanıñ topraq bütünligini ğayrıdan tiklev oğrunda halqara qol tutuvnıñ daa ziyade arttırılmasına hızmet etecektir.

Ukraina Prezidentiniñ Qırım Muhtar Cumhuriyetindeki Temsilciligi Ukraina çetel işler Nazirligi / MFA of Ukraine, Dmıtro Kuleba ve Ukrainanıñ BM teşkilâtı yanındaki Daimiy Temsilciligine / Perm Mission of Ukraine to the UN minnetdarlığını bildire.

Tafsilâtlı malümat: https://cutt.ly/BTWINsZ

Qırımnı işğalden azat etüv oğrunda berabermiz!

Añlaşmanı Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve ”Şarqıy Avropa Fondu” halqara hayriye teşkilâtınıñ Prezidenti Viktor Lâh öz imzalarınen tasdıqladılar.

Memorandum aşağıdaki faaliyetni maqsat etip qoyğandır:

vaqtınca işğal etilgen Qırım MC ve Aqyar şeeri topraqlarında Rusiye tecavuzına qarşılıq kösterüv, vaqtınca işğal etilgen topraqlarnı işğalden azat etüv ve ğayrıdan integratsiya etüv oğrundaki tedbirlerni beraberlikte amelge keçirüv

Halqara Qırım Platformasınıñ iştirakçileri tarafından qabul etilgen Umumiy beyannamedeki maqsatlarğa irişüv

halqara konsultativ-yönetici formatnıñ müim parçası olaraq Qırım platforması Ekspertler ağınıñ teşkil etilmesi ve faaliyetiniñ istiqrarlı şekilde yürsetilmesini maqsat etip qoyğan ğayretlerni idare etüv.

Umumiy vazifemizge qol tutqan ve ğayretlerimizni birleştirmege azır olğan er keske minnetdarlığımıznı bildiremiz.

Qırımnı işğalden azat etüv oğrunda berabermiz.