Haberler

Milât ve Yañı yıl arfesinde er kes masal ve tatil hayalları ile yaşay. İlk-evelâ buña balalar lâyıqtır. Olardan ise balalıqları qayğısız ve bulutsız olmağan balalardır.

Qırımdan memleket içinde avuşqan şahıslarnıñ, arbiylerniñ ve qanunsız şekilde apis etilgen vatandaşlarımıznıñ qorantalarından böyle balalar içün Olena Zelenska tatil bahşısını – ”Gizli M-niñ evi” yılbaş masalını azırladı. Bu temaşa içün tılsımlı yer olaraq Himeralı ev timsaliy şekilde hızmet etti.

Ukraina Prezidentiniñ Qırım Muhtar Cumhuriyetindeki Temsilciligi öz nevbette qoşulıp, Olena Zelenskanıñ teşebbüsine qol tuttı.

”Gizli M-niñ evi”, adiy bir temaşa degildir. Bu celp etici masalnıñ genç iştirakçileri adiseniñ qaranmanlarına çevirilip, aktörlarnen beraber Aziz Mıkolaynı qıdıra.

Balaçıqlar Himeralı evniñ odalarında dolaşıp, berilgen vazifelerni becerdi, tapmacalarnı çezdi, yip uclarını qıdırdı, sırlarnı açtı ve, eñ esası, tılsımğa toqunmaq imkâniyetine nail oldılar.

«Balalarğa kiçik mucize bağışlamağa niyetlenip, olar içün bu hayriye leyhanı meydanğa ketirdik , – dep izaatladı Ukraina Prezidentiniñ ömür arqadaşı Olena Zelenska.

Masal ilk kere taa 2019 senesi icra etildi. Ve o vaqıt Qırım balaları ilk kere bu temaşada iştirak etti.

Bu adise er yıllıq yılbaş adetine çevirilgeninden memnünmiz.

Qırım platforması şimdi nasıl etip çalışa: Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıçnıñ cevapları

UATV malümatları esasında azırlandı. Anton Korınevıç ile Oleg Borısov subetleşti

– Qırım platforması şimdi nasıl etip çalışa?

– Qırım platfromasınıñ bir qaç şekli ya da treki mevcut. 

Bu, mustaqil ekspertlerden ve ekspert teşkilâtlarından ibaret olğan Qırım platforması ekspertler ağı, ekspertler trekidir. İşbu trek çerçivesinde olar Ukraina devlet organları içün tevsiyeler meydanğa ketireler.

Ekinci trek, parlament trekidir. Ukraina Yuqarı Şurasında ”Qırım platforması” adında fraktsiyalar arası birleşmesi teşkil etildi. Em de bu, deputatlarımıznıñ, çeşit türlü halqara teşkilâtlarnıñ parlament assambleyalarınıñ mütenasip faaliyetidir.

Üçünci trek, Ukraina devlet olaraq areket etken akimiyet trekidir. O, tışqı ve içki treklerge bölüne. Tışqı trek içün mesüliyetli olğan Ukraina çetel işler Nazirligi al-azırda pek büyük, müim faaliyetnen oğraşa. Aslında o, Qırım ile bağlı bütün meseleler boyunca semereli bağ tutuvnı temin etmek maqsadınen Qırım platformasınıñ başqa aza-devletleriniñ çeşit türlü paytahtlarında, ükümetlerinde, çetel işler nazirliklerindeki kontakt şahıslar ağını teşkil ete. Bundan ğayrı, 2022 senesiniñ kiçik ayında Qaradeñiz regionında havfsızlıq meseleleri boyunca konferentsiyanıñ keçirilmesi planlaştırıla.

Qırım platformasınıñ içki treki içün Temsilciligimiz ve Qırım platformasınıñ faaliyetini temin etip, Qırım platformasınıñ milliy Ofisi vazifesini becergen hızmetimiz mesüliyetlidir. Biz vekâletlerimiz çerçivesindeki içki meselelernen oğraşamız. Mında qanun leyhaları ve muayyen leyhalarnı amelge keçirüv boyunca faaliyetimiz aqqında laf yürsetile.

Keçken afta Ukraina Yuqarı Şurası silâlı istilâ sebebinden serbestliklerinden marum etilgen şahıslarnı (”Kremlniñ mabuslarını”) içtimaiy ceetten qorçalav boyunca prezident tarafından taqdim etilgen qanun leyhasına birinci oquvda qol tuttı. Bu, Qırım platformasınıñ içki trekindeki faaliyetiniñ neticelerinden biridir.

– Qırım platforması çerçivesindeki neticelerni kelecekte Rusiyege qarşı sanktsiyalarnıñ quvetleştirilmesi içün qullanmaq mümkün olacaqmı?

– Elbette, çünki biz, birinciden, saktsiyalar aqqındaki bizim ukrain qanunını deñiştirmek kerek olğanı aqqında laf yürsetemiz. Qırım platforması qanun leyhaları paketine sanktsiyalar aqqında qanun leyhası da kirmektedir. Bundan ğayrı, ukrain sanktsiyalarını halqara ortaqlarımıznıñ sanktsiyalarınen uyğunlaştıruv meselesi de muzakere etilmekte.

Biz Qırımda yüz bergen bütün adiselerni – insan aqlarınıñ bozuluvını, ekologiya meselelerini, işğalci devletniñ bütün qanunsız areketlerini daima nezaret etemiz. Biz muntazam sürette bu malümatlarnı işbu sanktsiyalarnı işlete bilgen Ukraina devlet organlarına teslim etemiz.

– KÇNN-da memuriy hızmetlerni berüv meselesi nasıl aldadır?

– 2020 senesiniñ berim ayınıñ soñundan berli ecnebiy devletlerniñ vekilleri memuriy sıñırnı ziyaret etmege başladı. Biz bunı yapmağa başlağan soñ, diqqatnıñ esasen Donbasqa ayırılğanını, Qırım ile memuriy sıñır ise ziyaret etilmegenini añladıq. Amma Qırım boyunca faaliyetimizde ortaqlarımız Menbavaziyetni añlamalı, öz közlerinen körmelidir.

Qırım ile memuriy sıñırnı 30-ğa yaqın eyyet ziyaret etti. Biz bu faaliyetni devam ettirecekmiz. Bu meseleniñ müim olğanını qayd etemiz.

Bugünde-bugün Qırım ile memuriy sıñırda ”Qalançaq” ve ”Çonğar” KÇÇN-ları çalışmaqta. Biz Herson sıñır bölüginiñ işbu KÇNN-larında hızmet etken sıñırcıları ile daimiy şekilde bağ tutamız.

”Qalançaq” KÇNN al-azırda Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlikniñ balansına berildi. KÇNN-nıñ tolu vekâletli saibi bar olğanı pek müimdir. Hızmetlernen ve KÇNN-nıñ em rejim, em hızmet etici zonalarındaki faaliyetini temin etüvnen bağlı olğan bütün meseleler boyunca, endiden başlap, kimge muracaat etilecegi, bunıñ içün kimler mesüliyetli olğanı bellidir.

Ayrıca ”Çonğar” KÇNN-da introskopnıñ tiklenmesi de pek müimdir. Bu, fizikiy baquvnı qullanmayıp, vatandaşnıñ şahsiy şeylerinde neler olğanını teşkere bilecek mahsus rentgen cihazıdır. Bu, pek müim şey, em insan aqlarına riayet etüv, em de devlet havfsızlığıdır. ”Qalançaq” KÇNN-da da böyle introskopnıñ tiklenecegine ümüt etemiz.

Bundan ğayrı, ilk qış ayınıñ 1-de ”Qalançaq” ve ”Çonğar” KÇNN-larnıñ hızmet zonalarında halqara seviyede tanılğan aşılarnen aşılama başladı. Yani, ilk qış ayınıñ 1-den başlap, memuriy sıñırdan keçken Ukraina vatandaşları halqara seviyede tanılğan aşılarnen aşılana bile.

– İşğal etilgen Qırımdan qaç kişi al-azırda KÇNN-da aşılandı?

– Bayağı adam. Adamlar kele, bu malümatlarnı köre, olarnı Qırımğa haber ete. Aşılanğan vatandaşlarımız er kün bar. Esas mesele – anda haber etmek ki, adamlar onı körsin, eşitsin, añlasın ve bu hızmetnen faydalana bilsin. Bir künde onlarnen kişi ola bile.

Menba

«Bağçasaray efsaneleri», qırımtatar masalları esasında meydanğa ketirilgen acayıp ve tılsımlı maceradır.

Tünevin Kıyivde, Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıçnıñ sözlerine köre, dünyanıñ eñ güzel sanalarına lâyıq olğan ”Ve eñ esası, mıtlaqa bizim ukrain Qırımımızda sanalaştırılacaq temaşa” taqdim etildi.

«Bağçasaray efsaneleri», sevgi ile hainlik, ana-babalarnıñ balaları ile munasebetleri, dostlar ile duşmanlar aqqındaki acayip ikâyelerdir. Bu maceralı masal qırımtatar masallarınıñ mevzularını birleştirdi.

Temaşanı meydanğa ketirgen taqımğa, Genç seyirci teatriniñ bediy reberi Slava Jılağa, sanalaştırğan rejisör, Qırım MC-de nam qazanğan artist Ahtem Seyitablayevğa ğayretleri içün minnetdarlığımıznı bildiremiz. Acayıp ve çoq taraflama duyğular, aks ettirilgen qırımtatar ananeleri ve medeniyeti içün minnetdarmız.

Maqalede Anife Kurtseyitovanıñ fotoresimi işletildi.

Ukrainada balalarğa qırımtatar tilini ögretken «BÜLBÜL» multimedia platforması çalışmağa başladı. Ukrain tilindeki adı – «Соловей».

Bu tasil leyhası balalarnı tamır Qırım halqınıñ tili, tarihı ve adetleri ile tanıştırır.

«BÜLBÜL» taqımı özgün süretlerler ve muzıka ile yañı multfilmlerni ve ana-babalar ve ocalar üçün metodik qullanmalarnı meydanğa ketirdi. Tilşınaslarnen ocalar esas sözlük mevzularındaki kartlarnı, qırımtatar tiliniñ tercimesini ve telâfuzını numayış etken luğatnı tertip ettiler.

Platforma kiçkenelerge halq ve müellifleri belli olğan masallarnı ve yırlarnı, ocalarğa ise derslerniñ konspektlerini ve balalarnen oyunlar ve dersler keçirmek içün malümatlar teklif ete.

Leyha 5 yaşınace balalar içün teşkil etilgendir.

Malümatlarnı balalar bağçalarında, tasil merkezlerinde, mekteplerde ve onlayn-derslerde qullanmaq mümkün.

Tafsilâtlı malümat: https://www.bulbulkids.com.ua/uk

Platforma Ukraina medeniyet ve haber siyaseti Nazirliginiñ sımarışına binaen meydanğa ketirildi.

İlk qış aynıñ 17-de Ukraina Prezidentiniñ Qırım Muhtar Cumhuriyetindeki Temsilciliginde jurnalistler içün matbuat sabalığı keçirildi. Tedbir Temsilcilikniñ 29-yıllığına bağışlanğan edi.

Tedbirde Daimiy Temsilci Anton Korınevıç, onıñ muavinleri Darya Svırıdova ve Tamila Taşeva, Qırım MC-ni işğalden azat etüv ve ğayrıdan integratsiya etüv meseleleri boyunca bölükniñ reberi Olena Halimon iştirak ettiler.

Şu künü Temislcilik taqımı yarışta ğalebe qazanıp, yaqın vaqıtta Qırım platformasınıñ faaliyetini temin etüv Hızmetiniñ reberi vazifesine tayin etilecek Mariya Tomaknı jurnalistlerge taqdim etti.

”Ukraina Prezidentiniñ Qırım MC-deki Temsilciligi ve Qırım platforması faaliyetleriniñ niaiy maqsadı — Qırımnı işğalden azat etüv. Ğayretlerimiz buña yönetilgendir”, – dep qayd etti Anton Korınevıç. 

Temsilcilik taqımı, 1992 senesi ilk qış ayınıñ 17-de teşkil etilgen müessiseniñ faaliyetini, onıñ terkibindeki bölüklerni, esas yönelişleri ve 2021 senesi devamında alıp barğan faaliyetniñ neticelerini tarif etti.

Körüşüv iştirakçileri tafsilâtlı şekilde Qırım Platforması Ofisiniñ qanun yaratıcılıq saasındaki teşebbüsleri ve ayrı leyhaları üzerinde toqtaldılar. 

Hususan Ukraina Prezidentiniñ Qırım MC-deki Daimiy Temsilcisiniñ birinci muavini Darya Svırıdova ilk nevbette işğalden azat etüv Strategiyasını amelge keçirüvnen bağlı müim teşebbüsler paketi aqqında ikâye etti: ”Aslında, Qırım platformasına azırlıq çerçivesinde taqımımız Prezidentnen añlaşıp, işğalden azat etüv Strategiyasınıñ vazifelerini yerine ketirüvni ve Qırım platformasınıñ tedbirlerini amelge keçirüvni maqsat etip qoyğan muayyen normativ-uquqiy senetler paketini meydanğa ketirdik ve onıñ üzerinde çalıştıq. Böyle müim teşebbüsler arasında ”Qırım” serbest iqtisadiy zonasını lâğu etüv aqqındaki qanun, tamır halqlar aqqındaki qanun, silâlı istilâ neticesinde serbestlikten marum etilgen şahıslarnı (Kremlniñ esirlerini) içtimaiy ceetten qorçalav aqqındaki qanun leyhası bardır.

Bundan ğayrı, Temsilcilik ortaqlarınen beraberlikte bir sıra leyhalarnı amelge keçirmektedir. Bu aqta Daimiy Temsilciniñ muavini Tamila Taşeva ikâye etti. 

”Birincisi – Rusiye istilâsı virtual muzeyi. Muzey al-azırda meydanğa ketirildi ve müim malümatlarnen toldurıla. Ekinci leyha vaqtınca işğal etilgen topraqlarda yaşağan gençlerge bağışlanğandır. İşbu leyha bu kibi gençlerniñ tasilini, em de yalıñız aliy tasilni degil de, almaşuv programmalarnı da maqsat etip qoyğandır”, – dep ayttı o.

Tedbirniñ soñunda Anton Korınevıç jurnalistlerni Temsilcilikniñ ofisinde ve bu yerni eñ azından bir kere ziyaret etken er kes tarafından samimiyliknen ”Kıyivdeki Qırım köşesi” olaraq adlandırılğan azbarda kezdirdi.

İlk qış ayınıñ 17-de Ukraina Prezidentiniñ Qırım Muhtar Cumhuriyetindeki Temsilciligine plastunlar Vifleyemden barışıqlıq ateşini taqdim ettiler.

”Bu ateş eyilikni, sevgini ve yarıqnı temsil ete. Em de bugün o, bir timsal olaraq ilk kere Kıyivdeki Qırım köşesinde peyda oldı. Bu adise göñüllerimizni qızdıra ve kelecekte böyle ateşniñ plastunlar tarafından Qırımğa, Ukrainağa ait olğan Qırımğa taqdim etilecegine inandıra”, – dep ayttı Ukraina Prezidentiniñ Qırım MC-deki Daimiy Temsilcisi Anton Korınevıç.

Vifleyemden Barışıqlıq Ateşini darqatmaq adetini 1986 senesi Avstriyadaki Lints şeerinde çalışqan ”ORF” teleradioşirketi başlatqan edi. İlk başta tedbir imkâniyetleri sıñırlı olğan balalarğa, yardımğa muhtaç olğan er keske milâtnıñ arfesinde qol tutmaqnı maqsat etip qoyğan edi, amma birazdan manası daa ziyade terenleşken edi. Bu vazifeni ilk başından skautlar öz boynuna alğan edi.

Ukrainağa Vifleyem ateşi ilk olaraq 1992 senesi ayrı plastunlarnıñ şahsiy teşebbüsi olaraq kelip çıqqan edi. 1998 senesi ise ukrainalı plastunlar ilk kere resmiy şekilde Ateşni gümrük keçitinde lehistanlı hartserlerden alğan ediler. Bu anane bugünde-bugün de devam etmekte: er yıl ukrainalı plastunlar ukrain cemiyetine, kiliselerine, sıcaqlıq, barışıqlıq ve hristianlarnı birleştirip, sıñırlarnı aşıp, ğarptan şarqqa milât arfesinde areket etken ümütke muhtaç olğan er keske Barışıqlıq Vifleyem Ateşini bağışlaylar.

Ukraina Prezidenti Volodımır Zelenskıy bu müessiseniñ vazifesine yanaşuvnı deñiştirgen soñ, Temsilcilik vaqtınca işğal etilgen Qırım MC ve Aqyar şeeri topraqlarını qaytaruv ceryanında daa faal şekilde iştirak etip başladı, dep qayd ete Prezidentniñ Daimiy Temsilcisi Anton Korınevıç.

1992 senesi ilk qış ayınıñ 17-de Ukraina Yuqarı Şurası ”Ukraina Prezidentiniñ Qırım Cumhuriyetindeki Temsilciligi aqqında” 2875-XII sanlı qanunını qabul etken edi. Bu qanun qabul etilgen kün, Temsilcilikni teşkil etüv künü olaraq qayd etilmege başladı. Böyleliknen tarihiy ceetten müim faaliyetniñ ilk adımları başlanğan edi.

2014 senesiniñ baarinde Qırım yarımadası Rusiye Federatsiyası tarafından vaqtınca işğal etilgen soñ, Ukraina Prezidentiniñ Qırım Muhtar Cumhuriyetindeki Temsilciligi faaliyetini yarımadadan uzaq olmağan yerde – Herson şeerinde ğayrıdan tiklegen edi. RF tarafından insan aqlarınıñ kütleviy şekilde bozulğanını ve işğalden azat etüv ve ğayrıdan integratsiya etüv siyasetini inkişaf ettirüvniñ müimligini diqqatqa alıp, 2019 senesi Devlet başlığı, boynuna bir sıra strategik meselelerni alğan Temsilcilikniñ ofisini Kıyiv şeerinde açmağa qarar etti, Herson şeerindeki ofis ise taktik meselelerni çezmege ve vatandaşlarnıñ muracaatlarınen çalışmağa devam etti.

2019 senesi Volodımır Zelenskıy Anton Korınevıçnı Ukraina Prezidentiniñ Qırım MC-deki Daimiy Temsilcisi vazifesine tayin etti, onıñ muavinleri vazifesini Darya Svırıdova ve Tamila Taşeva becermege başladılar.

2021 senesi saban ayınıñ 11-nde Ukraina Prezidenti Volodımır Zelenskıy öz fermanı ile Ukraina milliy havfsızlıq ve mudafaa şurasınıñ «Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair devlet strategiyası aqqında» qararını amelge keçirdi, işbu Strategiya üzerinde yañılanğan Temsilcilik taqımı da faal çalışqan edi. 2021 senesi çiçek ayınıñ 13-de ise Ukraina Prezidenti ”Ukraina Prezdentiniñ Qırım Muhtar Cumhuriyetindeki Temsilciliginiñ ilk nevbetteki vazifeleri aqqında” 160/2021 sanlı Fermanını imzalap, işbu müessiseniñ vaqtınca işğal şaraitlerinde faaliyetine dair Strategiyanı ilk kere tasdıqladı.

Temsilcilik ortaqlarınen beraberlikte Qırımnı işğalden azat etüv ve ğayrıdan integratsiya etüv Strategiyasınıñ amelge keçirilmesini, keçici devirdeki adalet siyasetini meydanğa ketirilmesini maqsat etip qoyğan teşebbüsler, insan aqlarına riayet etüv, Ukrainanıñ topraq bütünligini ğayrıdan tiklev ve vaqtınca işğal etilgen topraqlarda yaşağan vatandaşlarımıznı qorçalav üzerinde çalışmaqtadır.

Temsilcilikniñ faaliyetindeki esas yönelişler:

• vatandaşlarımız içün memuriy hızmetlerge irişimni qolaylaştıruv;
• tıbbiy hızmetlerge irişimni temin etüv;
• gençler içün ukrain tasiline irişimni temin etüv;
• memuriy sıñırdan keçüv şaraitlerini eyileştirüv;
• devlet müessiselerine işançnı doğuruv ve işanç seviyesini qaviyleştirüv;
• insan aqlarınıñ bozuluvı adiselerini cedvelge aluv;
• eñ ağır cinayetlerni işlegenlerge nisbeten mesüliyetniñ qaçınmamazlığını kefil etmek içün ceza qanuniyetini mükemmelleştirüv;
• işğalge ve onıñ aqibetlerine alâqaları olğan şahıslarğa qarşı sanktiyalarnıñ qabul etilmesine teşviq etüv ve bir çoq başqa meseleler.

2020 senesi kiçik aynıñ 26-da Ukraina Prezidenti Volodımır Zelenskıy 58/2020 sanlı fermanı ile Ukrainada Qırım MC ve Aqyar şeeriniñ işğal etilüvine qarşılıq kösterüv kününi ilân etti. Bu müim kün er yıl qayd etilip, kerçekni ve adaletni temsil ete, çünki biz, vatandaşlarımıznıñ, RF propagandasına baqmadan, soñunace Qırımnıñ işğal etilmesine qarşılıq köstergenlerini hatırlamalımız.

Tamır halqlarnıñ, hususan qırımtatar halqınıñ aq-uquqlarını qorçalavğa ayrıca diqqat etile. 2021 senesi oraq ayınıñ 1-de Ukraina Yuqarı Şurası tarihiy adaletniñ tiklenmesini maqsat etip qoyğan ”Ukraina tamır halqları aqqında” 1616-IX sanlı qanunını qabul etti.

Temsilcilik taqımı vaqtınca işğal etilgen topraqları ğayrıdan integratsiya etüv boyunca Nazirlik, aq qorçalayıcı teşkilâtlarnıñ ekspertleri ile beraberlikte 2021 senesiniñ berim ayında Ukraina Prezidenti tarafından Ukraina Yuqarı Şurasına taqdim etilgen ”Ukrainağa qarşı silâlı istilâ sebebinden şahsiy serbestliklerinden marum etilgen şahıslarnı ve olarnıñ qoranta azalarını içtimaiy ve uquqiy ceetten qorçalav aqqında” qanun leyhasını azırlavda iştirak etti.

Temsilcilik Qırımnıñ işğalden azat etilmesine dair Devlet başlığınıñ esas teşebbüsini – ”Qırım platforması” halqara meydançıqnı başlatuvda iştirak etti. Arman ayınıñ 23-de 46 eyyet ve halqara teşkilâtnı toplağan teşebbüsniñ qurulış sammiti olıp keçti. Temsilcilikniñ terkibinde sammit künlerinde Kıyivniñ merkezinde Qırım platforması milliy ofisini açqan Qırım platformasınıñ faaliyetini temin etüv hızmeti meydanğa ketirildi.

Bugünde-bugün Temsilcilikte 34 taqım azası çalışmaqta, olarnıñ bir qısmı Qırımdan kelme vatandaşlardır. Olar içün işğalden azat etüv ve ğayrıdan integratsiya etüv evlerine qaytuv yolunda Qırım yarımadasınıñ qaytarıluvını maqsat etip qoyğan şahsiy çağruvdır.

”İhtisaslı taqımnı toplap, Qırım yarımadasınıñ keleceginen bağlı olğan muzakere etüvlerniñ er bir seviyesinde iştirak ete bilmek bizim içün pek müim edi. Temsilcilikniñ vazifelerine yanaşuvnıñ deñiştirilmesi ve Kıyivde faaliyetimizni temin etip, idareler arası işbirlikni quvetleştirgen kerçek bir ofisni açmaq imkâniyeti, Qırımnıñ qaytarıluvına dair izçen siyasetni şekillendirüv yolunda Ukraina Prezidenti tarafından atılğan müim bir adımdır. Temsiclik aqqındaki fermanğa kirsetilgen deñişmeler sayesinde, vaqtınca işğal etilgen Qırım MC ve Aqar şeeri topraqlarınıñ qaytarıluvınen bağlı ceryanlarda iştirak ete bilemiz ve birinci neticelerimizni numayış etmege endi azırmız”, – dep qayd etti Anton Korınevıç.

O, Ukraina Prezidentiniñ Qırım MC-deki Temsilciligi mıtlaqa öz qapılarını Aqmescit şeerinde açacağında eminligini bildirdi.

”29 yıldönüm, hulâsa çıqartacaq, ğalebelernen paylaştıracaq ve Qırımnı işğalden azat etüv ve ğayrıdan integratsiya etüv yolunda faaliyetimizni devam ettirecek vaqıttır. Vaqtınca işğal etilgen topraqlarda qanuniy tertipni ğayrıdan tiklev, Qırımda er bir vatandaşımızğa insan aqlarını ve serbestliklerini qaytaruv oğrunda çalışamız”, – dep yekün çekti Devlet başlığınıñ daimiy temsilcisi.

Temsilcilikniñ Aqmescit şeeride öz qapılarını ille ğayrıdan açacağını bilemiz!

Ukraina Yuqarı Şurası birinci oquvda ”Ukrainağa qarşı silâlı istilâ sebebinden şahsiy serbestliklerinden marum etilgen şahıslarnı ve olarnıñ qoranta azalarını içtimaiy ve uquqiy ceetten qorçalav aqqında” qanun leyhasına qol tuttı. 328 rey berildi!

Qanun leyhası Ukraina Prezidenti Volodımır Zelenskıy tarafından acele olaraq taqdim etildi.

Ukraina Prezidentiniñ Qırım MC-deki Daimiy Temsilcisi Anton Korınevıç şunı qayd etti: ”Bu kün pek çoq adam ve hususan Kreml mabuslarınıñ qorantaları içün müimdir. İleride ekinci oquv, tüzetmeler, amma müim temel endi qoyuldı…”

6104 sanlı qanun leyhası Ukrainağa qarşı silâlı istilâ sebebinden şahsiy serbestliklerinden marum etilgen şahıslarnı ve olarnıñ qoranta azalarını içtimaiy ve uquqiy ceetten qorçalamaq içün qanuniy vastalarnı meydanğa ketirmekni maqsat etip qoyğandır.

Qanunda Ukrainağa qarşı silâlı istilâ sebebinden şahsiy serbestliklerinden marum etilgenler olaraq tanıla bilecek şahıslar açıq-aydın şekilde belgilendi. Olarnı şartlı olaraq böyle çeşitlerge ayırmaq münkün:

• esirge tüşken arbiyler (Ukraina devlet egemenligini, mustaqilligini ve topraq bütünligini qorçalağanları içün istilâcı devlet ve onıñ organları tarafından serbestlikten marum etilgen Ukraina vatandaşları);
• grajdan reineler (Ukrainanı, başqa devletnı, halqara teşkilâtnı, adliy ya da fizikiy şahıslarnı şantaj etmek maqsadınen serbestlikten marum etilgen Ukraina vatandaşları);
• siyasiy sebeplerden apis etilgenler (Ukraina tarafdarları olaraq baqışlarını, qıymetlerini ve mevamlarını numayış etmek maqsadınen alıp barğan faaliyetleri, ya da grajdanlıq, professional, siyasiy, aq qorçalayıcı faaliyetleri munasebetinen istilâcı devlet ve onıñ organları tarafından serbestlikten marum etilgen Ukraina vatandaşları).

Şu cümleden, qanun bir-de-bir şahısnıñ Ukrainağa qarşı silâlı istilâ neticesinde şahsiy serbestliginden marum etilgenini belgileycek mahsus Komissiyanıñ teşkil etilmesini közde tuta ve işbu Komissiyanıñ vekâletlerini tarif ete. Hususan Komissiya yuqarıda qayd etilgen meseleler boyunca qararlarnıñ qabul etilmesi içün lâzim olğan malümatlarnı elde etmek, teşkermek ya da tüzetmek maqsadınen talaplar yollamaq aqqına naildir.

Ukraina Prezidenti Volodımır Zelenskıyğa ve işbu qanun leyhasını azırlağanlarnıñ cümlesine minnetdarlığımıznı bildiremiz.

Halq deputatlarına ise qol tutuvları içün minnetdarmız!

Ankara şeerinde İnsan aqlarını qorçalav künü munasebeti ile Türkiyedeki Ukraina Elçihanesi Kırım Dernekleri Genel Merkezi ile beraberlikte vaqtınca işğal etilgen Qırımdaki qırımtatarlarnıñ aq-uquqlarını qorçalav meselesine bağışlanğan konferentsiyanı teşkil etti.

Tedbirde Türkiye Prezidentiniñ Baş muşaviri Yalçın Topçu, Qırımtatar Milliy Meclisiniñ reisi Refat Çubarov, Ukraina Prezidentiniñ Qırım MC-deki Daimiy Temsilcisi Anton Korınevıç, Ukraina halq deputatı Rustem Umerov, Türkiye parlamentiniñ deputatı Emine Nur Günay, Qırımtatar dernekleri Baş merkeziniñ başlığı Namık Kemal Bayar iştirak ettiler.

Anton Korınevıç Türkiye cemiyetini Ukraina Prezidenti Volodımır Zelenskıynıñ vaqtınca işğal etilgen Qırım MC ve Aqyar şeeri topraqlarına dair siyasetiniñ esas unsurlarınen tanıştırdı.

Hususan memleket içinde avuşqan şahıslarnıñ ve vaqtınca işğal etilgen topraqlarda yaşağan Ukraina vatandaşlarınıñ, şu cümleden tamır qırımtatar halqınıñ aq-uquqlarını ve menfaatlarını qorçalav ile bağlı teşebbüsleri aqqında ikâye etti.

“Qırımda insan aqlarınıñ bozuluvı, hususan siyasiy mabuslar meselesi, olarnıñ 80% ise qırımtatarlar teşkil ete, Ukraina Prezidenti Volodımır Zelenskıynıñ ve Ukraina devletiniñ kün tertibinde daima bulunmaqtadır”, – dep qayd etti Anton Korınevıç.

”Qırımtatarlar ve işğal etilgen Qırımda insan aqları” mevzusındaki ilmiy panel çerçivesinde Daimiy Temsilci vaqtınca işğal etilgen Qırım Muhtar Cumhuriyeti ve Aqyar şeeri topraqlarında insan aqları saasındaki vaziyetke dair obyektiv malümatlarnen paylaşıp, Rusiye Federatsıyası Qırımnıñ ilhaq etilmesini qabul ettirmek maqsadınen qorqutuv ve manipulâtsiya vastalarını işletkenini qayd etti.

Ukraina eyyeti içün böyle tedbirlerde iştirak etüv aşağıdaki sebeplerden ötrü müimdir:

 Qırım platforması çerçivesinde Ukrainağa qarşı Rusiye istilâsına qarşılıq kösterüv oğrundaki ğayretlerni birleştirüv;

 Qırımnı işğalden azat etüv ve ğayrıdan integratsiya etüv meselelerinde Ukrainağa halqara qol tutuvnı quvetleştirüv;

 vaqtınca işğal etilgen topraqlarda insan aqları bozuluvlarınıñ ve cenk cinayetleriniñ qurbanlarını qorçalav;

 kelecekteki işbirlik içün halqara bağlarnı quruv.

Fotoresim: Türkiye Cumhuriyetindeki Ukraina Elçihanesi