Haberler

İlk qış ayınıñ 9-da Ukraina Prezidentiniñ Qırım MC-deki Temsilciliginde Ukrainadaki silâlı davadan zarar körgenlerni qorçalav saasındaki eñ müim teşebbüsler mukâfatlandırıldı.

Şu aqşam zarar körgenlerniñ meselelerinen oğraşqanlardan birden 10 kişi nişanlarını aldı. Merasim Ukrainada ve dünyada ilk qış ayınıñ 10-da qayd etilgen Halqara insan aqları kününe bağışlanğan edi.

Temsilcilik taqımı ”Qırım sakinlerini qorçalav oğrundaki muntazam faaliyet” mukâfatını aldı. Mukâfatnı Daimiy Temsilciniñ muavinleri Darya Svırıdova ve Tamila Taşeva aldılar.

Darya Svırıdova Qırım sakinleriniñ aq-uquqlarını muntazam sürette qorçalamağa yardım etken bütün ortaqlarımızğa minnetdarlığını bildirdi.

Tamila Taşeva tedbirde bulunğanlarğa al-azırda apishanede yatqan Server Mustafayevniñ keçenlerde Temsilcilikke minnetdarlıq olaraq, esirlikte öz ellerinen yapqan qalemni teslim etkeni aqqında ikâye etti.

”İşte böyle vaqialar ne içün küreşkenimizni añlamağa yardım ete”, – dep yekün çekti Tamila Taşeva.

Vesiqa Qırım platformasına qol tutuvnı bildire ve RF-nı yarımadağa silâ ve arbiylerini avuştıruvnı toqtatmağa çağıra. Böyle qararname dört yıldan berli qabul etile.

İşğalci devlet Rusiye Federatsıyası tarafından Qırımnıñ arbiyleştirilüvi halqara cemiyetni lâqayd qaldırmay.

Vesiqada aşağıdaki meseleler munasebetinen raatsızlıq bildirile:

Qırımda RF arbiy-deñiz bazalarınıñ topraqları qanunsız şekilde kenişletile

RF silâlı qurulışlarına arbiy tesisler etrafındaki topraq ve suvnı tosmenge tutmaq vekâletleriniñ berilüvi gemilerniñ serbest şekilde Keriç boğazından keçe bilmelerini telüke altına qoymaqtadır.

Qararname RF halqara gemicilikke ve hususan Azaq deñizinden ve Keriç boğazından ukrain limanlarına ve qarşı tarafqa areket etken gemilege aselet keder etüvden qaçınmaq kerek olğanına açıq-aydın şekilde işaret ete.

Bundan ğayrı, qararname RF-nı aşağıdaki areketlerge çağıra:

Qırım sakinleriniñ qanunsız şekilde öz silâlı quvetlerine çağırıluvını toqtatmaq

Qırımda tasilniñ arbiyleştirilüvini – kelecekte RF silâlı quvetlerinde hızmet ettirmek maqsadınen Qırım balalarını mekteplerde arbiy hızmetke azırlamaqnı toqtatmaq.

Qırımnıñ arbiyleştirilüvine ve işğal etilgen Qırımda insan aqları saasındaki vaziyetke dair BM Baş Assambleyası tarafından er yıl qabul etilgen qararnameler Rusiye işğaline qarşı küreşte ve Qırım platforması çerçivesinde faaliyette ciddiy siyasiy ve diplomatik aletler olaraq hızmet etmektedir.

Qararname Rusiyege uquqiy basqınıñ yañı unsurıdır. İşğalci devlet halqara uquqnıñ esas şartlarını boza, BM Havfsızlıq Şurasınıñ daimiy azasına lâyıq olmağan davranışlarda buluna.

Ukraina Prezidentiniñ Qırım MC-deki Daimiy Temsilcisi Anton Korınevıç ve onıñ muavinleri Darya Svırıdova ile Tamila Taşeva qanunsız şekilde apiste tutulğan Ukraina vatandaşı, Qırımtatar Milliy Meclis reisiniñ muavini Nariman Celâlovnıñ abulqatı Mıkola Polozov ile körüşti.

Körüşüvde vaqtınca işğal etilgen Qırım MC ve Aqyar şeeri topraqlarında Ukraina vatandaşlarına qarşı siyasiy cezalavlar ve insan aqları saasında bozuluvlarnıñ muntazam sürette devam etmesi meseleleri muzakere etildi. Muayyen kriminal davalar, hususan Nariman Celâlovğa, ağa-qardaş Ahtemovlarğa qarşı davalar ve koloniyağa yollanılğan İvan Yatskinniñ mecburiy sürette açlıq tutması aqqında haber etildi.

Daimiy Temsilci qanunsız şekilde tutulğan Ukraina vatandaşlarını azat etüv oğrundaki devlet siyaseti deñişmey qalğanını qayd etti. Qırım Platforması teşebbüsleri paketine kirgen ”Ukrainağa qarşı silâlı istilâ sebebinden şahsiy serbestliklerinden marum etilgen şahıslarnıñ ve olarnıñ qoranta azalarınıñ içtimaiy ve uquqiy qorçalanması aqqında” qanun lehasınıñ Ukraina Yuqarı Şurası tarafından baqılmasını bekleymiz.

Qırımni işğalden azat etüv ve Ukraina vatandaşlarını azat etüv oğrunda beraberlikte areket etemiz.

Bugün, ilk qış ayınıñ 7-de, ”Memuriy sıñırdan keçirilüvi yasaq etilgen ya da sıñırlanğan mallar cedveli (fiyatı/ağırlığı/miqdarı) ve şahsiy şeyler olaraq tanıla bilecek mallar cedvelini tasdıqlav aqqında” emir amelge keçirildi.

Emir ”«Qırım» serbest iqtisadiy zonasını teşkil etüv ve vaqtınca işğal etilgen Ukraina topraqlarında iqtisadiy faaliyetni yürsetüv aqqında” Ukraina Qanunını küçüni ğayıp etken olaraq tanuv ve bazı Ukraina qanunlarına deñişmeler kirsetüv aqqında” Ukraina qanunını yerine ketirmek maqsadınen qabul etildi. https://zakon.rada.gov.ua/laws/show/1618-20#Text

Emir yasaq etilgen mallar cedvelini belgiley, muayyen mal çeşitlerini sıñırlay ve şahsiy şeyler olaraq tanıla bilecek mallarnı qayd ete. Memuriy sıñırdan hususan şahsiy şeylerni keçirüvge dair başqa sıñırlamalar yoq.

Memuriy sıñırdan keçirilüvi yasaq etilgen ya da sıñırlanğan mallar cedvelinen bu yerde tanış olmaq mümkün: https://cutt.ly/rYxLIXC.

Diqqat

Qullanuv alâmetlerini taşımayıp, memuriy sıñırdan fizikiy şahısnıñ qolunda ve refaqatında bulunğan yük olaraq keçirilgen mallarğa nisbeten esas sıñırlamalar:

vaqtınca işğal etilgen Qırım Muhtar Cumhuriyeti ve Aqyar şeeri topraqlarına – sıñırlama yoq

vaqtınca işğal etilgen Qırım Muhtar Cumhuriyeti ve Aqyar şeeri topraqlarından – bir kişi başına cemi fiyatı 10 biñ grivnadan ziyade ve/ya da cemi ağırlığı 75 kilodan (aşayt malları – er bir çeşiti 2 kilodan, aşayt olmağan mallar – er bir çeşiti 2 daneden) ziyade olmaycaq.

Aynı vaqıtta, emir fizikiy şahıslar tarafından memuriy sıñırdan naqıtnıñ keçirilüvini bir tertipke ketire. Naqit aşağıdaki miqdarda keçirile bile:

 100 biñ grivnâdan ziyade olmaycaq

 ya da memuriy sıñırdan keçirilgen künü Ukraina milliy bankı tarafından belgilengen kurs boyunca onıñ ecnebiy para şeklinde qarşılığı.

 paralarnıñ miqdarı 100 biñ grivnâdan ziyade olsa, olarnıñ ne yerden asıl olğanı vesiqanen tasdıqlanmalıdır.

Emir Qırım platforması qanuniy deñişmeler paketine kirmektedir.

Bugün Ukraina Prezidentiniñ Qırım Muhtar Cumhuriyetindeki Temsilciliginde / Qırım platforması Ofisinde G7 devletlerniñ elçileri, elçihanelerniñ ve Ukrainada AB Temsilciliginiñ vekilleri, Ukraina çetel işler Nazirliginiñ reberiyeti ile pek müim körüşüv olıp keçti.

Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç tafsilâtlı şekilde aşağıdaki meselelerni tarif etti:

 Temsilcilik taqımı içün ilk nevbetteki olğan ve şu cümleden ”Qırım platforması” fırqalar ara birleşmesi ile işbirlikte azırlanğan qanun leyhaları

 Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyası ve onı yerine ketirüv planı

 Temsilcilikniñ ve Qırım Platforması Ofisiniñ ağımdaki leyhaları.

Ayrıca o, Temsilcilik ve Qırım Platforması Ofisi vaqtınca işğal etilgen topraqlarda yaşağan Qırım ve Aqyar şeeri sakinlerinen ve memleket içinde avuşqan şahıslarnen daimiy sürette bağ tutqanlarını qayd etti.

Bundan ğayrı, Anton bey vaqtınca işğal etilgen Qırım ile memuriy sıñırda, ilk qış ayınıñ 1-den başlap, tacmarazdan aşılanmaq münkün olğanı aqqında haber etti. ”Qalançaq” ve ”Çonğar” KÇNN-da aşılav merkezleri açıldı. Aşılav merkezlerinde Pfizer, Moderna ve Coronavac aşıları mevcuttır.

Ukraina çetel işler Naziriniñ birinci muavini Emine Caparova ”Qırım platformasınıñ” qurulış Sammiti Qırımnı işğalden azat etüvni maqsat etip qoyğan birinci halqara formatnı meydanğa ketirgenini qayd etti.

Qırım platforması ise al-azırda Qırımnı işğalden azat etüvni, Ukrainanıñ topraq bütünligini ğayrıdan tiklevni, Qırım MC ve Aqyar şeeriniñ Rusiye Federatsıyası tarafından vaqtınca işğal etilmesiniñ aqibetlerini aşuvnı, bundan ğayrı, Ukraina vatandaşlarınıñ aq-uquqlarını ve menfaatlarını qorçalavnı maqsat etip qoyğan ve halqara ğayretlerni birleştirgen esas tışqı siyasiy vastadır.

Emine hanım Qırım platformasınıñ final maqsadı, Qırımnıñ işğalden azat etilüvi ve onıñ Ukraina nezareti altında tınç diplomatik yolnen qaytarıluvı olğanını qayd etti.

Körüşüvde Etyen de Ponsen (Frenkistannıñ Ukrainadaki Fevqulâde ve Vekâletli Elçisi), Larısa Ğaladza (Kanadanıñ Ukrainadaki Fevqulâde ve Vekâletli Elçisi), Anka Feldguzen (Almaniya Federal Cumhuriyetiniñ Ukrainadaki Fevqulâde ve Vekâletli Elçisi), Pyer Françesko Dzadzo (İtaliyanıñ Ukrainadaki Fevqulâde ve Vekâletli Elçisi), Kristina Kvin (ABD-niñ Ukrainadaki Elçihanesiniñ vekâletlisi), Nikolas Harroks (Büyük Britaniya ve Şimaliy İrlandiya Birleşken Qırallığınıñ Ukrainadaki Elçihanesi, Elçi muavini), Kadzuya Otsuko (Yaponiyanıñ Ukrainadaki Elçihanesi, nazir-muşavir), Artur Gebal (AB Temsilciligindeki bölük reberi), Philippine Chevalier (Frenkistan Cumhuriyetiniñ Ukrainadaki Elçihanesi, mahsus muşavir), Satoru Homma (Yaponiyanıñ Ukrainadaki Elçihanesiniñ üçünci kâtibi), Richard Colvin (DHoM, Kanadanıñ Ukrainadaki Elçihanesi) ve digerleri iştirak etti.

Körüşüv esnasında Ukraina Prezidentiniñ Qırım MC-deki Daimiy Temsilcisi Anton Korınevıç musafirlerni Temsilcilikniñ ve Qırım Platformasınıñ faaliyetinen tanıştırdı.

Taraflar beraberlikte tasil saasında kelecekteki leyhalarnı, şu cümleden, vaqtınca işğal etilgen Qırım Muhtar Cumhuriyetinden kelme mezunlarnen bağlı meselelerni muzakere ettiler.

Vaqtınca işğal etilgen topraqlarda yaşağan ukrain gençlerine qol tutqan ve lâqayd qalmağan zenaatdaşlarımızğa minnetdarlığımıznı bildiremiz.

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime

”Keçici devirdeki adalet, vaqtınca işğal etilgen topraqlarnı işğalden azat etüv ve ğayrıdan integratsiya etüvge dair devlet siyasetiniñ zaruriy unsırudur” – bu aqta Ukraina Prezidentiniñ Qırım MC-deki Daimiy Temsilcisi Anton Korınevıç ”Farqlı nesillerniñ vazifesi olaraq Donbastaki çatışuvnı aşuv: adaletke, dialogga ve barışuvğa teşviq etüv” mevzusında halqara forum esnasında ikâye etti.

Forum şarqıy Ukraina boyunca  CivilM+ Üçünci halqara forum çerçivesinde olıp keçti. Teşkilâtçılar: İnsan aqları boyunca Ukraina-Helsinki birligi.

Tedbirdeki körüşüvi esnasında Anton Korınevıç Rusiye Federatsıyasınıñ Ukrainağa qarşı sılâlı istilâsınıñ qurbanlarına kefaletlerini temin etüvge dair devlet siyasetiniñ temeli olaraq keçici devirdeki adaletniñ milliy şekline yanaşuvnı tarif etti. Keçici devirdeki adaletniñ yanaşuvlarını amelge keçirüv, normativ-uquqiy senetlerde, hususan Ukraina Prezidentiniñ Qırım Muhtar Cumhuriyetindeki Temsilciliginiñ faaliyeti aqqındaki Ukraina Prezidenti Fermanında onı pekitüv ve yanaşuvlarını bugünde-bugün devlet ve uquq qorçalav organları tarafından amelde işletüv müim olğanını qayd etti.

Cenkniñ sebepleri ve esas adiseleri aqqında hatırlavlarnen çalışuv, işğal şaraitlerinde eñ ağır cinayetlerni ve insan aqları bozuluvlarını nezaret etüv, cedvelge aluv ve taqiq etüv, keçici devirdeki adaletniñ müim vastaları, olar Ukraina Prezidenti Fermanı ile tasdıqlanğan Vaqtınca işğal etilgen Qırım MC ve Aqyar şeerini işğalden azat etüv ve ğayrıdan integratsiya etüvge dair stratetegiyada ve onı amelge keçirüv boyunca tedbirler planında aks etilgendir.

Qapsihor köyünde qırımtatar milliy areketiniñ veteranı, faal Rustem Üseyinovnıñ evi viran etildi.

Faal Rustem Üseyinovnıñ evini viran etüv, mülkiyet aqlarınıñ qaba şekilde bozuluvıdır.

Regional insan aqları merkeziniñ abulqatı Mıkola Kikkas izaatlağanı kibi, ”İşğalci akimiyetniñ areketlerini işğal ve mülkiyetni yoq etmege yasaq etken Halqara gumanitar uquq şartlarını bozuv ceetinden muzakere etmek kerek. Bu, Rusiye Federatsıyasınıñ nevbetteki arbiy cinayetidir”.

Üseyinovnıñ evi yoq etilgen soñ, lâqayd qalmağan qırımlılar onı öz evlerine yaşamağa çağıralar. Amma al-azırda hastahanede bulunğan Rustem Üseyinovnıñ özü jurnalistlerge Qapsihornı terk etmege niyeti olmağanını haber etti. Hastahaneden çıqqan soñ o, sabıq eviniñ yerinde çadır tiklep, anda ”ana toprağında yaşamaq aqqı içün küreşini devam ettirmege” niyetlene. Menba: Qırım Aqiqat

Bundan ğayrı, vaqtınca işğal etilgen yarımadada Rusiye quvetçileri boş aynıñ 23-de Aqmescitteki vaqtınca keçindirüv tevqifhanesiniñ binası yanına kelgen faallerni yaqaladı.
Olar 12 künlük memuriy apisten soñ çıqqan abulqat Edem Semedlâyevni qarşılap, oña qol tutmağa istegen ediler.

Quvetçiler 31 kişini yaqaladı, olardan 10 – qadındır. Yaqalanğan jurnalistlerniñ yanında press-kartları bar edi.

Abulqat Edem Semedlâyevniñ fikirince, qırımtatar faallerniñ yaqalanuvı, işğalci akimiyet insanlarnıñ narazlıqqa çıqqanlarını ve öz yaqınlarına qol tutqanlarını begenmegeninen bağlıdır.

Ukraina Prezidentiniñ Qırım Muhtar Cumhuriyetindeki Temsilciligi işğalci akimiyetniñ areketlerini qattı sürette taqbih ete ve insanlarğa qarşı cezalavlarını toqtatmağa çağıra!

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime