Bugün qararnen saat 4-ten başlap, aynı vaqıtta bir qaç Ukraina vatandaşları, qırımtatarlarnıñ evlerinde tintüvler keçirildi. Tintüvler Bağçasaray rayonında, Balaqlava ve Aqmescitte yüz berdi. Dört vatandaşımız yaqalanıp, al-azırda işğalci Rusiye Federatsıyasınıñ FSB idaresinde buluna. Olar:

1) Qırımnıñ Bağçasaray rayonında yaşağan Osmanov Ansar İsmail oğlu. ”Qırım birdemliginiñ” faali, taqip etilgen qırımtatarlar, Qırım musulmanlarğa qarşı siyasiy sebeplerden açılğan davalar boyunca mahkeme oturışuvlarına muntazam sürette qatnay edi.

2) Qırımnıñ Aqmescit rayonında yaşağan Abdulvapov Amethan Necip oğlu.

3) Qırımnıñ Qarasuvbazar rayonında yaşağan Mustafayev Marlen Ramis oğlu. ”Qırım birdemliginiñ” faali, 2017 senesi qırımtatarlarnıñ repressiyalarğa oğratılmasına qarşı bir kişilik piketniñ iştirakçisi, Qırımda maküm etilgenlerniñ qorantalarına gönülli olaraq qol tutqan adam.

4) Aqyar şeeriniñ Balaqlava rayonında yaşağan Seytosmanov Ernes Kâzim oğlu. 17 yılğa azatlıqtan marum etilgen siyasiy mabus Enver Seytosmanovnıñ doğmuş ağasıdır.

Abulqat Emil Qurbedinovnıñ bildirgenine köre, ”Tintüvler keçirilgen vaqıtta Qırımdaki bir çoq abulqat, aq qorçalayıcı ve jırnalistlerde mobil telefon bağı çalışmay edi, olarnen bağlanmaq imkânsız edi. Sözde tahqiqat areketleri esnasında mobil telefon bağı aselet çalışmağanı aqqında laf yürsetile”.

Ukraina Prezidentiniñ Qırım Muhtar Cumhuriyetindeki Temsilciligi işğalci RF akimiyetiniñ areketlerini qattı sürette taqbih ete ve vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina vatandaşlarınıñ qanunsız şekilde yaqalanmasını ve azatlıqtan marum etilmesini, siyasiy sebeplerge esaslanğan başqa taqip etüvlerni deral toqtatmağa talap ete.

Qırım Muhtar Cumhuriyeti ve Aqyar şeeri Prokuraturası bu munasebet ile kriminal dava açqanını haber etti: https://t.me/prokark/987

Şunı da qayd etmek kerek ki, al-azırda 120-ge yaqın şahıs işğalci devlet tarafından siyasiy sebeplerden azatlıqtan marum etilip, vaqtınca işğal etilgen Qırım Muhtar Cumhuriyeti, Aqyar şeeri topraqlarında ve Rusiye Federatsıyasındaki apishanelerde buluna.

Bağışlañız, bu metin tek “Укр” tilinde mevcuttır.

Bağışlañız, bu metin tek “Укр” tilinde mevcuttır.

Ukraina Prezidentiniñ Qırım Muhtar Cumhuriyetindeki Temsilcilik taqımı Qırımtatar Milliy Meclis reisiniñ birinci muavinine, al-azırda RF esirliginde bulunğan Nariman Celâlğa bugün qol tutuv mektüplerini yazdı.

Nariman şimdi başqa vaqıtlarğa köre qol tutuvımızğa daa ziyade muhtacdır. Er kesni – tüşünce liderlerini, siyasetçilerni, cemaat faallerni içtimaiy ağlarında halq ögündeki mektüplerini yazmağa çağıramız. Qol tutuvımız pek müimdir. O, küç bere ve ümüt doğura.

Dinşınas, cemaat erbabı, sözde ”Donetsk halq cumhuriyetiniñ” vicdan esiri İgor Kozlovskıy:  https://cutt.ly/AOoQAix  ve aq qorçalayıcı, Ukraina Helsinki Birliginiñ teşkilâtçısı Mıroslav Marunovıç  https://cutt.ly/qOom6fp  Narimanğa öz mektüplerini endi yazıp yolladılar.

Bundan ğayrı, siz şahsiy mektüpleriñizni de yaza bilirsiñiz. Olarnı doğrudan-doğru Rusiye cezalavlarnı yerine ketirüv federal hızmetiniñ tertibatı vastasınen yollay bilesiñiz, ya da bizge yollasañız, biz olarnı vaqtınca işğal etilgen Qırımğa yiberirmiz.

Apishanedeki tsenzuracıdan keçip, alıcınıñ qoluna tüşmek içün, mektüpler müim talapqa riayet etmeli – rus tilinde yazılmalılar.

Hatırlatamız ki, Nariman Celâl – ukrainalı qırımtatar siyasetçisi, oca, siyasetşınas, jurnalist, cemaat faali, Qırımtatar Milliy Meclis reisiniñ birinci muavinidir.

Nariman Celâl berim ayınıñ 4-de Aqmescit civarındaki Biy Tanış köyünde Federal havfsızlıq hızmeti tarafından keçirilgen tintüvden soñ yaqalanğan edi. Tintüv ve apis etüv onıñ Qırım platformasında iştirak etüvinden soñ yüz berdi.

Nariman Celâlğa qol tutuv mektüplerini yazmağa çağıramız

Meclis reisiniñ birinci muavini, qanunsız şekilde maküm etilgen Nariman Celâlnıñ ömür arqadaşı Leviza Celâlova aqayından alğan yañı mektüpni derc etti:

«Men, Asan ve Aziz 21-nci senesiniñ soñunı davamıznıñ kâğıtlarını ögrenüvge bağışladıq.  Kimerde, nevbetteki cıltını oquğan soñ, mündericesini muzakere etmege başlay, amma ertemi, keçmi em davanıñ özü, em de onınen bağlı kâqıtlarnıñ ekseriyeti yalan olğanını hatırlap, toqtay edik.

Bu yalannıñ müellifleri ağızlarımıznı qapatmaq, bizni qorqutmaq ve cezalavlarını devam ettirmek istey.

Em de devam ettire. Sözde davamızğa alâqaları olğan adamlar qıynavlarğa oğratıldı.

Asan ve Aziz ”bergen” şaatlıqlar fizikiy ve ruhiy basqı neticesinde elde etilgenini endi bilesiñiz. Olar zenaatlarını masqara etken vicdansız şahıslar tarafından degil de, namuslı abulqatlar tarafından qorçalanmağa başlağan soñ, bu şaatlıqlarından vazgeçken ediler.

Dava tahminlerge ve sahte ”isbatlarğa” esaslana. Qabaatıma ya da niyetlerime dair iç bir türlü kerçek ve adaletli isbat körmedim. Amma tahqiqat olarğa muhtac degil. Çünki mahkeme adaletni tiklemey, siyasiy sımarışnı yerine ketirecek.

Kerçek mahkeme ceryanı olğan olsa, bu dava dağılır, biz ise aqlanır edik.

Diversiyanı kerçekleştirmek maqsadınen añlaşma, “Rusiyege qarşı siyasiy nefret” sebebinden gaz borusını patlatmaq niyetim olması kibi maña qarşı qabaatlavlarnı isbatlağan iç bir türlü inandırıcı delil (ses ya da video, yazışuv, kerçek şaatlarnıñ şaatlıqları) körmedim.

Davanıñ bir-birine uymağan qısımları tahqiqatnıñ istegen er şeyni, sañki men nasıldır insanlarnı öz tarafıma çekkenimni, nasıldır insanlarnen patlavnı muzakere etkenimni aytqan üç gizli şaatnıñ sözleri esasında bir-birine uyacaq şekilde deñiştirile.

Bağışlañız, bu metin tek “Укр” tilinde mevcuttır.

Ukraina Prezidentiniñ Qırım Muhtar Cumhuriyetindeki Temsilciligi Rusiye Federatsiyasınıñ cezalavlarnı yerine ketirüv müessiselerinde Qırım Muhtar Cumhuriyeti ve Aqyar şeeri topraqlarında yaşağan siyasiy mabuslarğa nisbeten tamamınen qanunsız, insan namusını ve menligini aşalağan areketlerni taqbih ete, qanunsız şekilde apis etilgen Ukraina vatandaşları bu areketlerge daima şikâyet ete ve yardım soray.

“Rusiye Federatsıyasını Rusiye topraqlarında ve işğal etilgen Qırında uydurılğan qabaatlavlar esasında azatlıqtan marum etilgen Ukraina vatandaşlarını azat etmege çağıramız”

Bu aqtaki Qararnameni Ukraina Nazirler Şurası 2021 senesi ilk qış ayınıñ 23-de qabul etti.

Kim, nasıl etip ve ne yerde ”bala paketini” ala bilecegine dair tafsilâtlı infografika ve malümalarnı azırladıq.

İşte:

Onı kim ala bile?

Yañı doğğan balanıñ anası, babası, onı evlâtlıqqa alğan adamlar, tuvğanları, vasiyleri ve terbiyecileri.

Olar:

• Ukraina vatandaşları 
• Ukrainağa qanuniy şekilde kelip çıqqan ve Ukraina topraqlarında daimiy şekilde ya da vaqtınca yaşağan ecnebiyler ve vatandaşlıqları olmağan şahsılar
• Ukrainada qaçaq ya da qoşma qorçalavğa muhtac olğan şahıslar olaraq tanılğan insanlar ola bile.

Qaysı vesiqalar tapşırılacaq?

Vaqtınca işğal etilgen topraqlarda yaşağan vatandaş, balanıñ adına Ukraina vatandaşlarınıñ grajdanlıq statusını resmiy qayd etüv bölügi tarafından berilgen doğuv aqqında şeadetnameni taqdim etmeli.

Onı elde etmek ve balanıñ vaqtınca işğal etilgen topraqta doğğanını tasdıqlamaq içün mahkemege muracaat etmelisiñiz. Bundan soñ ise mahkeme qararı esasında Ukraina vatandaşlarınıñ grajdanlıq statusını resmiy qayd etüv bölüginde doğuv aqqında şeadetnameni ala bilirsiñiz. 

”Bala paketini” kimler bere?

”Bala paketini” ana-babasına: 

• Kıyiv şeerindeki devlet memuriyetinde ealini içtimaiy ceetten qorçalav meseleleri boyunca teşkiliy bölük
• bala Donetsk ve Lugansk vilâyetleriniñ vaqtınca işğal etilgen topraqlarında ya da vaqtınca işğal etilgen Qırım Muhtar Cumhuriyeti ve Aqyar şeeri topraqlarında doğğan olsa, paketni alacaq vatandaşnıñ yaşağan/bulunğan yerindeki köy, qasaba, şeer şurasınıñ icra organı bermeli.

Nege esaslanıp berile: alacaq şahısnıñ Ukraina topraqlarında yaşağanı qayd etilgen olsa, ya da memleket içinde avuşqan şahıs olaraq cedvelge alınğanğa dair malümat kâğıdı mevcut olsa, alacaq şahısnıñ kâqıt şeklinde bergen arizası ve balanıñ adına vatandaşlarınıñ grajdanlıq statusını resmiy qayd etüv bölügi tarafından berilgen doğuv aqqında şeadetname esasında berile.

Bunınen beraber, ana-babalar ”bala paketiniñ” fiyatı miqdarında bir kerelik tazminatnı ala bile. Bu aqta tafsilâtlı şekilde nevbetteki maqalemizde haber etermiz.

2021 senesi qıyın, amma Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv meselesi ceetinden pek semereli oldı.

2021 senesi içinde yüz bergen irişüvlerimiznen paylaşmağa isteymiz:

başqa devlet organları ve ekspertler ile beraberlikte Ukraina Prezidenti Volodımır Zelenskıynıñ Fermanı ile tasdıqlanğan ”Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair strategiyanı” meydanğa ketirdik.

başqa ortaqlarımıznen beraberlikte 46 memleket ve teşkilât tarafından Qırımnı işğalden azat etüv meselesini kötergen, bu mevzunı halqara kün tertibine qaytarğan ”Qırım platforması” qurulış samitiniñ azırlanuvında iştirak ettik;

Temsilcilikniñ temelinde Qırım Platforması Ofisini açtıq, «Ukraina Prezdentiniñ Qırım Muhtar Cumhuriyetindeki Temsilciliginiñ ilk nevbetteki vazifeleri aqqında» Ukraina Prezidenti Fermanı ile müessisemizniñ vaqtınca işğal devamındaki faaliyetine dair Strategiya tasdıqlandı;

2021 senesi devamında vatandaşlarımızdan 6000 muracaat qabul ettik;

vaqtınca işğal etilgen Qırım yarımadası ile memuriy sıñırnı Ukrainada çalışqan çetel devletlerniñ elçileri ve başqa itibarlı eyyetler ile qararnen 30 kere ziyaret ettik;

yüksek devlet yarlıqlarğa vaqtınca işğal etilgen topraqlarda yaşağan 9 vatandaşımıznı, şu cümleden, Kremlniñ siyasiy mabusı Volodımır Dudkanı, qırımtatar aq qorçalayıcıları Mumine Saliyeva ve Abdureşit Cepparovnı, Qırımtatar Milliy Meclis azasını, abulqat Emine Avamilevanı, aq qorçalayıcı Alöna Lunövanı ve digerlerni tayın ettik;

Temsilcilikniñ teklifi üzerine Levko Lukyanenko adına devlet stipendiyaları siyasiy mabuslar Vladıslav Yesipenko, Server Mustafayev ve Seyran Saliyevge berildi;

Ukraina Yuqarı Şurası ”Qırım” serbest iqtisadiy zonasını lâğu etüv aqqında qanun, Ukraina Prezidenti Volodımır Zelenskıy tarafından taqdim etilgen ”Ukraina tamır halqları aqqında” qanun kibi bir sıra qanunlarnı qabul etti. Birinci oquvda ise RF-nıñ silâlı istilâsı neticesinde serbestlikten marum etilgen şahıslarnı (Kremlniñ mabuslarını) içtimaiy ceetten qorçalav aqqında qanun leyhası qabul etildi;

Ukraina milliy hatıra institutı ve başqa ortaqlarımız ile beraberlikte Rusiye Federatsıyası tarafından Qırım yarımadası, qısmen Donetsk ve Lugansk vilâyetlerindeki Ukraina topraqlarını işğal etilüvi devamında işlengen cinayetler ve esas adiseler aqqında kerçekni bildirip, dünyada birincilerden olğan dijital vastanı – Rusiye istilâsı virtual müzeyini meydanğa ketirip çalıştırdıq;

ortaqlarımıznen beraber Ukraina ealisiniñ Ukraina topraqlarındaki silâlı davanıñ aqibetlerini aşuv, keçici devirdeki adaletniñ milliy şekli aqqındaki fikirleri ve baqışları boyunca birinci umum milliy tedqiqatnı keçirdik.

Ve bularnen yetinmedik.

2022 senesiniñ de em qıyın, em de vaqialarnen zengin olacağına azırmız. Temsilcilik taqımını yekâne maqsat – yarımadamıznı işğalden azat etüv – oğrunda daa çoq iş ve yañı çağıruvlar beklemektedir.

Ukraina Prezidenti Volodımır Zelenskıyğa Qırımnı işğalden azat etüv oğrundaki faaliyeti içün minnetdarlığımıznı bildiremiz.

Ve faaliyetimizge qol tutqan er keske minnetdarlığımıznı bildirmege isteymiz.

Müim teşebbüslerni meydanğa ketirüv saasındaki işbirlik içün ortaqlarımızğa minnetdarlığımıznı bildiremiz.

Qırımdan asıl olup, anda yaşamağa devam etken, öz evlerini terk etmege mecbur olğan ve al-azırda esirlikte bulunğan bütün vatandaşlarımız aqqında hatırlaymız. Olarnıñ cümlesi üçün, olarnıñ aq-uquqlarını qorçalav ve eñ yaqın vaqıtta evlerine qaytmaları oğrunda çalışamız!

Er keske tınçlıq, sabır, sağlıq, ümütlerini ve raatlıqlarını coymamaqnı tileymiz.

Qırımımızda insan aqlarınıñ bozulmamasına, bütün vatandaşlarımıznıñ havfsızlıqta bulunmalarına ıntılamız. Bizim ukrain Qırımımız Rusiye Federatsıyasınıñ işğalinden azat etilmegence, buña iç bir türlü imkâniyet yoqtır.

Onıñ içün bizim eñ müim Yañı yılımız, Qırımda ukrain bayraqları ğayrıdan tiklengen künü qayd etilecektir. Bu vaqıtqace ise toqtamayıp semereli şekilde çalışmaq kerekmiz.

Yañı yılda Qırımğa bizim ukrain bayrağımıznıñ qaytmasını beraber arzulayıq!

Yañı yılıñız hayırlı olsun!

Özüñizge ve Ukrainağa muqayt oluñız!