Haberler

Bağışlañız, bu metin tek “Укр” tilinde mevcuttır.

Bugünki oturışuvda Ukraina Nazirler Şurası Ukraina Prezidentiniñ teşebbüsi üzerine Levko Lukyanenko adına devlet stipendiyasınıñ Qırımtatar Milliy Meclis reisiniñ birinci muavini Nariman Celâlğa berilmesine qol tuttı.

Ükümetimizge böyle qol tutuv içün minnetdarlığımıznı bildiremiz!

Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlikke Levko Lukyanenko adına devlet stipendiyasınıñ Nariman Celâlğa berilmesine dair teklifni ve bütün kerekli vesiqalarnı Ukraina Prezidentiniñ Qırım Muhtar Cumhuriyetindeki Temsilciligi 2021 senesi ilk qış ayınıñ 29-da teslim etken edi.

Nariman Celâl endi yarım yıl devamında işğal etilgen Qırımdaki apishanede qanunsız şekilde tutulmaqtadır. O, berim ayınıñ 4-de yaqalanğan edi. Narimannın evindeki tintüv ve onıñ özüniñ yaqalanması Qırım Platformasında iştirak etken soñ yüz berdi.

Hansaray umumcian qıymetini taşığan tarihiy ve medeniy abidedir. Bu, qırımtatar saray mimarcılığınıñ dünyada yekâne nümünesidir. Saray Bağçasaray tarihiy-medeniy qoruğınıñ terkibine kirmektedir. Öz vaqtında , Geray sülâlesinden Qırım hanlarınıñ yazlıq evi edi. Kompleksniñ terkibine saray, harem binası, hanlar mezarlığı ve cami kirmektedir.

Aslında tarihiy abideni yoq ete yatqan ”tamirlev” işleri 2017 senesiniñ küzünde başlatılğan edi. Yani Hansaray endi 4 yıl devamında izçen şekilde aselet yoq etilmektedir. Keçenlerde ise saray binasınıñ duvarlarından birinde 3 metrge yaqın uzunlığında çatlaq peyda oldı. Duvarnıñ yıqılmaması içün işçiler onı tahtalarnen tiredi.

Hatırlatamız ki, 2016 senesi sözde Qırım ”ükümetiniñ” ”devlet komitetiniñ medeniy asabalıqnı qorçalav boyunca ilmiy-metodik şurası” yarımadanıñ bir qaç tarihiy abidesinde, şu cümleden Bağçasaraydaki Hansarayda qazalarğa qarşı ilk nevbetteki işlerniñ keçirilmesini uyğunlaştırdı.

Açıq İnternet menbalardan belli olğanı kibi, 2016 senesi işğalciler Bağçasaraynıñ Hansarayına ait olıp qorçalanğan yerde tarihiy binanı yoq etmege başladı, keççe ise abide üzerinde restavratsiya şartlarına ve qaidelerine riayet etmegen qurucılıq işleri alınıp barılğanı aqqında malümat peyda oldı.

14.05.1954 senesi qabul etilgen Konventsiyanıñ silâlı dava esnasında medeniy qıymetlerni qorçalav aqqındaki 5-inci maddesine binaen vaqtınca işğal etilgen Ukraina topraqlarında bulunğan medeniy qıymetlerniñ qorçalanması içün Ukraina ile beraberlikte kerekli tedbirlerni keçirmek mecburiyetinde qalğan işğalci devlet Rusiye Federatsıyası tarafından Ukrainağa iç bir türlü muracaatlar yapılmadı.

Qırımdaki işğalci memuriyet işbu işlerni ”ilk nevbetteki ve qazalarğa qarşı” olaraq adlandırdı. Mündericesi boyunca bular restavratsion işler, amma usulı boyunca tamamınen qurucılıq işleridir. Zemaneviy malzemeler ve usullar işletile, XVI-XVIII asırlarğa ait olğan abidelerde bularnıñ işletilmesi ise kesen-kes mümkün degildir.

Medeniy ve tarihiy asabalıq bir-de-bir halqnıñ belgilenmesiniñ temelindedir. Bu temelni yoq etüv, hatıranı yoq etmek ve halqnı yavaş-yavaş unutıluvğa maküm etmek manasına kele.

Ukraina Prezidentiniñ Qırım Muhtar Cumhuriyetindeki Temsilciligi Rusiye Federatsıyasını yekâne ve beñzeri olmağan tarihiy abideniñ yoq etilüvini toqtatmağa çağıra.

Ukraina Rusiye Federatsıyasına nisbeten mümkün olğan er türlü basqı usullarını qullanacaq ve işbu unikal abide mevzusında halqara ortaqlarımıznen ve şu cümleden dünyadaki medeniy asabalıqnıñ qorçalavınen oğraşqan halqara teşkilâtlarınen bağ tutacaqtır.

Bugün Estoniya Cumhuriyeti Riygikognıñ reisi yolbaşçılığındaki Estoniya parlamentiniñ eyyeti ”Çonğar” KÇNN-nı ziyaret etti. Tedbirde Ukraina Prezidentiniñ Qırım MC-deki Daimiy Temsilcisi Anton Korınevıç ve Ukraina Yuqarı Şurasınıñ halq deputatları bulundı.

Estoniya Ukrainanıñ egemenligine ve topraq bütünligine qol tutqanını qayd etti. Bundan ğayrı, Ukrainanı yanğızlıqta qaldırmaycağını ve umumiy telükesizlikni tiklev oğrunda devletimizniñ işançlı ortağı olacağını vade etti.

Estoniyağa mevamı içün minnetdarmız!