2021 senesiniñ çiçek ayından başlap berim ayına qadar ”Almenda” grajdanlıq maarif merkezinde çalışqan zenaatdaşlarımız ”Umumiy tasil: kelecekni beraberlikte quramız” leyhası çerçivesinde vaqtınca işğal etilgen Qırım Muhtar Cumhuriyeti ve Aqyar şeeri topraqlarında yaşağan Ukraina vatandaşlarınıñ tasil aqlarını ve tasil ihtiyaclarını yerine ketirüvni nezaret etip, işbu topraqlarda yaşağan vatandaşlarımız içün Ukrainada tasil aqlarınıñ mevcudiyetini, maqbuliyetini ve uyğunlaştırıluvını miqdar ve keyfiyet ceetinden belgilegen köstergiçlerni tedqiq etip, ”Vaqtınca işğal etilgen Qırımdan kelme balalarnıñ tasil aqlarını yerine ketirüvge dair devlet siyasetine qıymet kesüv” mevzusında analitik esabatnı azırladılar.
Nezaret etüv esnasında aq qorçalayıcılar Qırım sakinleri içün hususan uzaqtan ve eksternat şekilinde tasil imkâniyetleriniñ keyfiyetini, kiriş imtianlarını tapşıruv usullarını, mundericesini ve Qırım sakinleriniñ olarğa azırlanmaq imkâniyetini, Qırımda ukrain tilini ögrenmek imkâniyetini, vaqtınca işğal etilgen topraqlardan kelip çıqqan abituriyentler içün devlet tarafından meydanğa ketirilgen azırlav kurslarınıñ ve vaqtınca işğal etilgen topraqlardan kelip çıqqan abituriyentlerni qolaylaştırılğan usulnen qabul ete bilecek aliy oquv yurtlarınıñ hususiyetlerini tedqiq ettiler.
Analitik esabat vaqtınca işğal etilgen Qırım yarımadasından kelip çıqqan balalarnıñ tasil aqlarını yerine ketirüv saasındaki devlet siyasetini çeşit türlü taraflardan nezaret etüv neticesinde elde etilgen malümatlarğa esaslana. Esabattaki malümatlar vaqtınca işğal etilgen Qırım yarımadası topraqlarında yaşağan Ukraina vatandaşlarınıñ Ukraina aliy oquv yurtlarına kirişke azırlanuv ve kiriş basamaqlarına köre (mustaqil şekilde azırlanuvdan, individual tasil aluv usulı ve azırlav kurslar şeklinde devlet tarafından teklif etilgen imkâniyetlerni qullanuvdan kiriş imtianlarını tapşıruv ile aliy oquv yurtını saylavğa qadar) beyan etile.
Esabatta bildirilgen manialarnı ve çağıruvlarnı aşuv oğrunda beraberlikte çalışamız.